Магнит

3815. Җаны юк, каны юк,
Үзе тимерне тарта.

Электр агымы, ток

3816. Абыйсы булмаса — апасы да юк,
Апасы булмаса — абыйсы да юк,
Икесе бергә — була яшен, ут.

3817. Нечкә-нечкә баулардан
Бик күп атлар чабыша.

3818. Атасы аягын киенгәнче,
Улы Мәскәүгә барып җитә.

Электр белән эретеп ябыштыру

3819. Кайчысыз киселә,
Җепсез тегелә.

Корыч кою

3820. Адәм шул хәтлегә җитә:
Ташны ут итә,
Утны су итә,
Ул суны тагын таш итә,
Итә дә, өстенә утырып китә.

Атом энергиясе

3821. Күрер күзгә күренми,
Капшыйм дисәң, беленми;
Тузан хәтле үзе юк;
Гайрәтенең чиге юк,
Куәтенең тиңе юк.

Тимерче эше

3822. Күр күрелди,
Көзән сызгыра,
Арык төя билен бора,
Адырган елан авызын ача.

Тимерче, сәүдәгәр, кәрванчы,
юлаучы, сунарчы, балыкчы

3823. Тимер-корыч булатны
Камыр иткән бар микән?
Озын, озын, озын юл,
Очына чыккан бар микән?
Арка авылның утыннан¹
Ат утлаткан бар микән?
Тибенгесен тирләтеп
Төнлә юрткан бар микән?
Кунан куйның² койрыгын
Ялгыз җигән бар микән?
Идел белән Җаекның³
Билен буган бар микән?

Завод гудогы

3824. Аю бабай акыра,
Дус-ишләрен чакыра.

Фотоаппарат

3825. Озын-озын өч аяк,
Өч аягы бер таяк;
Гармун күреге күк үзе,
Маңгаенда бер күзе.

3826. Кечкенә генә үзе,
Маңгаенда күзе,
Күрсә, онытмый үзе.

Фоторәсем

3827. Кешесе бар, җаны юк.

3828. Үзе миңа карап тора,
Үзе мине күрми.

Курчак

3829. Минем белән уйныйлар,
Кулларыннан куймыйлар,
Иркәлиләр, сөяләр,
Йокла, иркәм, дияләр.
Үсә төшкәч, балалар
Мине онытып калалар.

3830. Күзе — мөес⁴,
Колагы — киес⁵.

Бөтерчек

3831. Түм-түгәрәк, кып-кызыл,
Әйләнәдер зыр да зыр.

Уенчык туп

3832. Тигез җирдән киталмый,
Үргә таба меналмый,
Түбән таба тукталмый.

3833. Йөгерә белми, сикерә белә.

3834. Җәй буе сикерә,
Кыш буе тик тора.

3835. Үзе кеп-кечкенә,
Үзе миннән биек сикерә.

3836. Миннән бик күп тәбәнәк,
Үзе йөри тәгәрәп.

3837. Күтәреп җиргә бәрдем,
Күктән тотып алдым.

1. Ут — үлән.

2. Кунан куй — ике яшьлек куй (сарык).

3. Җаек — Урал елгасының татарча исеме.

4. Мөес — мөгез.

5. Киес — киез.