3337. Ач песидән тычкан котылмас.

3338. Зыянчы песи күзен елтыратыр.

3339. Ишектәге песигә «перес!» дисәң, түрдәге песигә тияр.

3340. Йоклап яткан мәче авызына тычкан үзе килеп керми.

3341. Карак мәче син таяк алганчы сизенеп качар.

3342. Карт мәче иркәләгәнне яратмый.

3343. Киштәдәге казылык өзелеп төшә дип, песи ачка үлгән.

3344. Күп йоклаган мышык тычкан тотмый.

3345. Май ашаган песи төгеннән билгеле.

3346. Мыштым мәче майны күбрәк ашый.

3347. Мышык канатлы булса, тургай көн күрмәс иде.

3348. Мышык югында — тычканга бәйрәм.

3349. Мәче асрамаган тычкан асрар.

3350. Мәче баласын көлгә болгап ашар.

3351. Мәче битен юа — колак арты кап-кара.

3352. Мәче булмаган җирдә тычканнар хуҗа.

3353. Мәче иткә буе җитмәгәч, «сөрсегән» дияр, имеш.

3354. Мәче күмәр — эт ачар, бүре күмәр — төлке ачар.

3355. Мәче майны сакламый.

3356. Мәче: «Мич башында калаем, сәндерәдә сараем»,— дип җырлый, имеш.

3357. Мәче сычкан оясына керә алмас.

3358. Мәче, теге дөньяда хуҗасының хөрмәтен танар өчен, күзен йомып ашар, имеш.

3359. Мәче тырнагында сандугач сайрамас.

3360. Мәче урлар, эт түләр.

3361. Мәче уңайга сыпырсаң мырлый, кирегә сыпырсаң тырный.

3362. Мәче әйтә ди: «Хуҗасы сукыр булса иде, балалары күп булса иде»,— дип.

3363. Мәче, үзе йокласа да, күсене күрә.

3364. Мәче үзе уйнаш итәр, үзе каравыл салыр.

3365. Мәчегә уен, тычканга кыен.

3366. Мәчедән артканны эт җыяр.

3367. Мәчедән мәче туар, ул да булса сычкан куар.

3368. Мәчене түбәдән атсаң да, дүрт аягы өстенә төшәр.

3369. Песи аркасы белән җиргә төшми.

3370. Песи белән уйнаган тырнавына түзсен.

3371. Песи сөт салып ала белмәсә дә, чүлмәкне аудара белә.

3372. Песи тычкан алдында — арыслан, арыслан алдында — тычкан.

3373. Песи тычканнан качмас.

3374. Песи уңган булса, тычкан да елгыр булыр.

3375. Песи, югары аскан итне ала алмагач, «бүген уразамын», дигән.

3376. Песи үз балаларын җиде кат яшерә.

3377. Песинең тычкан сөзәсе юк: аңа мөгез ни эшкә?

3378. Сыйпаганны песи дә ярата.

3379. Тәүфыйклы песи дә каймак ашый.

3380. Урлашкан песи син таяк алганчы ук ни өчен икәнен белә.

3381. Хуҗасы янында булса, мәче дә эт баса.

3382. Ялкау мәче янында тычканнар уйнар.

3383. Аның мәчесе дә куян тота.

3384. Араларында үлгән мәче ята.

3385. Араларыннан кара мәче үткән.

3386. Бер мәчегә ике эт ябышкан.

3387. Дөрес, мәче: дүрт аягы, сигез тырнагы.

3388. Каймак эчкән мәче кебек.

3389. Койрыгы пешкән мәче кебек порсалану.

3390. Май ашаган мәче кебек күзләрне уйнату.

3391. Мәче төчкергән саен исең китмәсен.

3392. Песием, «перес», аягың-кулың дөрес, тычкан тотарга кереш.

3393. Суга төшкән песи кебек йөрү.

3394. Таба ялаган мәче шикелле карана.

3395. Табаны пешкән мәче төсле кая басарга белми.

3396. Такы-токы, мәче боты.

3397. Эчтә мәче кычкыру.