Актүш белән Әнвәр
Тик яткан Актүш янында
Акыл өйрәтә Әнвәр:
– Гел ятып кына торма, – ди, –
Зарядка ясап җибәр.
– Мин сезне саклап ятам бит,
Өйгә бур кермәсен дип.
Әгәр мин гел йөреп торсам,
Күрмичә каламын бит.
– Ә син йөгергән чагыңда
Өреп-өреп алгала.
Шулай итсәң, – ди , – яныңа
Якын килмәс карга да.
– Нишләп үзең, укып кайткач,
Гел йокларга ятасың?
Ишегалдын кар каплаган,
Аны бар бит атасың.
Әнвәрне өйрәтте Актүш.
Әнвәр өйрәтте аны.
Икәү бергә йөгерешеп
Түктеләр яуган карны.
Җәүдәт һәм чебиләр
Әби-әни, күрегезче,
Күпме йомырка җыйдым.
Берничәсен, пешәргә дип,
Мунча миченә куйдым.
Тавыклар күп сала икән.
Безнең тавыклар әйбәт.
Җырлап кына йөриләр, дип
Мактап туймады Җәүдәт.
Чеби чыгарырга диеп
Утырган булган тавык.
Әбекәй, моны ишеткәч,
Әздән китмәде авып.
Тизрәк мунчага йөгерде,
Йомыркалар янына.
Кызу тия күрмәсен дип
Чебиләрнең җанына.
Нәниләр борын калкытып,
Тәгәрәшеп яталар.
Берсен-берсе уздырышып
Кабыкларын ваталар.
Җәүдәт чыгарган чебиләр
Бар да таза, сәламәт .
Шундый хәл дә була икән
Дөнья булгач, җәмәгать.
___________________________________________
Вәлиуллина Илзирә Сәмигулла кызы Түбән Кама шәһәренең «Кама таңнары» әдәби берләшмәсенең сәркатибы, иң яшь һәм иң актив әгъзаларының берсе. Аның әсәрләре «Туган як», «Татарстан яшьләре, «Шәһри Казан», «Ватаным Татарстан», «Мәдәни җомга», «Көмеш кыңгырау», «Татар иле» газеталарында, «Идел», «Сәхнә», «Мәйдан», «Казан утлары» журналларында дөнья күрә.
«Аккошлы күл» исемле шигырьләр китабы дөнья күрде.
Балаларга бүләк = Подарок детям.– Казань: Рухият, 2007.– 208 с.
|
