| Посетители |
Онлайн всего: 3 Гостей: 3 Пользователей: 0 |
|
Главная » 2024 » Декабрь » 7 » АХМАК БҮРЕ (Белорус халык әкияте)
АХМАК БҮРЕ (Белорус халык әкияте) | 15:47:36 |
Яшәгән, ди, бер ахмак Бүре. Ул шулкадәрле ахмак булган ки, хәтта үз тамагын да туйдыра алмаган. Аптырагач, ярдәм сорап, Арыслан янына барган бу.
— Ә-әнә теге болынны күрәсеңме? — дигән аңа Арыслан.— Анда бер карт Алаша утлап йөри. Бар да шуны аша.
Бүре болынга чабып төшкән дә:
— Хәлләрең ничек, бахбай? Арыслан миңа сине ашарга кушты,— дип сүз каткан.
— Кай җиремнән ашый башлыйсың: койрыктанмы, баштанмы? — дигән аңа карт Алаша.— Койрыктан башласаң, яхшырак булыр кебек. Син койрыкны ашаган арада, мин авыз белән үлән чемченеп, бераз симерә, ит кундыра торыр идем.
Бүре, ризалашып, койрык янына килүгә, карт Алаша моны куш аяклап тибеп очырган.
— И ахмак та инде мин! Койрыктан түгел, баштан тотынырга кирәк булган! — дип ыңгырашкан Бүре.
Бүтән чарасы калмагач, ул тагын Арыслан янына киңәшкә киткән. Урман патшасы бу юлы аны болында уйнап йөрүче Бозау янына җибәргән. Бүре болындагы Бозауны эзләп тапкан да Арысланның аны ашарга рөхсәт бирүен әйткән.
— Бер бозау сиңа күпкә җитмәс. Өстемә менеп атлан, мин сине авылга алып барырмын. Анда бозауларның исәбе-хисабы юк! Көтүче булып ялланырсың да көн саен бер бозау ашарсың! — дигән аңа Бозау.
Бүре өстенә менеп атлануга, Бозау җан-фәрман чабып киткән. Авылга килеп керүгә, ул бар көченә мөгрәп җибәргән. Шулчак кулларына кайсы сәнәк, кайсы көрәк тоткан агайлар йөгерешеп чыкканнар да Бүрене, кыйный-кыйный, авылдан куып җибәргәннәр, ди.
Ай юрганы : Дөнья халыклары әкиятләре / [тәрҗ. һәм төз. Разил Вәлиев ; рәссамы Диләрә Нәүрузова].- Казан: Татар, кит. нәшр., 2011.- 302 б.
ISBN 978-5-298-02107-4
Китапта дөнья халыклары әкиятләре туплап бирелә. |
|
Категория: Дөнья халыклары якиятляре |
Просмотров: 4 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
