| Посетители |
Онлайн всего: 1 Гостей: 1 Пользователей: 0 |
|
Главная » 2024 » Декабрь » 07 » АКЫЛЛЫ ЮЛӘР (Әфган халык әкияте)
АКЫЛЛЫ ЮЛӘР (Әфган халык әкияте) | 15:31:43 |
Шулай беркөнне падишаһ ялгызы гына шәһәр читенә йөрергә чыккан. Бераз баргач, моның каршысына Гали Мөхәммәт очраган. Әче телле, чая холыклы бу кешене танып алган падишаһ болай дип сүз каткан:
— Дөресен әйт әле: илегезнең падишаһы рәхимсез кешеме?
— Рәхимсез генә түгел, ерткыч ул! — дип җавап биргән Гали Мөхәммәт.
— Ә син мине таныйсыңмы соң? — дип җикергән аңа падишаһ.
— Күргән кешем түгел... Чит илдәнме әллә?..
Бу сүзләрне ишеткәч, падишаһ бөтенләй чыгырыннан чыккан:
— И син, адәм актыгы! Күзеңне ачыбрак кара! Каршыңда падишаһ үзе басып тора! Падишаһ хакында яман сүз сөйләү — иң зур җинаять!
— Тагын мин гаепле булып калдым,— дип, авыз эченнән мыгырданган Гали Мөхәммәт.—Димәк, мине юкка гына «Тиле Гали» дип йөртмиләр икән... Үз падишаһымны да танымадым... Аның турында яман сүзләр сөйләдем... Ярый, нишлим, падишаһ рәхимсез булса да, ул кадәр үк ерткыч түгелдер, күрә торып юләр кешегә кул күтәрмәс әле...
Падишаһ бераз уйланып торган да болай дигән:
— Үзең юләр булсаң да, сүзләрең шактый акыллы күренә. Юк, бер дә тиле кешегә охшамагансың син, тиле булып кыланасың гына! Шуңа күрә сине рәхимсез җәза түгел, ә гадел хөкем көтә!
— Хөкемдарым минем! Һич кенә дә сезнең белән бәхәскә керәсем килми,— дип елмаеп җавап биргән аңа Гали Мөхәммәт.— Әмма сез үзегезгә үзегез каршы киләсез бит... Сез мине «акыллы» дип атадыгыз, юләр булуыма ышанмадыгыз. Әйтегез әле: бу дөньяда акыллы кеше үзенең падишаһына дөресен әйтә аламы? Хөкемдарга дөресен сөйләү өчен минем кебек тиле Гали булырга кирәк бит!..
Ай юрганы : Дөнья халыклары әкиятләре / [тәрҗ. һәм төз. Разил Вәлиев ; рәссамы Диләрә Нәүрузова].- Казан: Татар, кит. нәшр., 2011.- 302 б.
ISBN 978-5-298-02107-4
Китапта дөнья халыклары әкиятләре туплап бирелә. |
|
Категория: Дөнья халыклары әкиятляре |
Просмотров: 35 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
