 Бер бай, аена ике йөз реал түлим дип, хезмәтче яллый икән. Ай тулгач, аңа:
— Калага барып, миңа ике әйбер алып кайт, шуннан соң акчаңны бирермен,— дип, дөньяда булмаган әйберне табарга куша икән. Шулай итеп, бу бай бик күп негрларны алдаган, ди.
Бервакыт аңа шул ук ике йөз реалга бер малай килеп ялланган. Ай азагы җиткәч, бай әйткән бу малайга:
— Калага бар да базардан миңа «ха-а» белән «хи-и» алып кайтып бир,— дигән.
Малай башта моңа аптырап калган, аннары әмәлен тапкан. Базарга киткән булган да байга бер кап-кара шешә алып кайтып биргән. Ә шешә эченә чаян белән кыргаяк салган.
— Менә сиңа «ха-а» белән «хи-и» алып кайттым,— дигән бу байга.— Шешә эченә бармагыңны тыгып эләктереп ал үзләрен.
Хуҗасы бу хәлне күреп бик гаҗәпләнгән, шулай да шешә авызына бармагын тыккан. Тыгуы булган, тегенең бармагын чаян шундый каты итеп тешләп алган, бай, авыртуга чыдый алмыйча: «Ха-а!» — дип акырып җибәргән.
Малай аңардан көлгән дә әйткән:
— Инде тагын бер тапкыр бармагыңны тыгып кара, бу юлы «хи-и» эләгеп чыгар,— дигән.
Бай икенче кат шешәгә тыгылырга курыккан, ә малайга ике йөз реалны түләргә мәҗбүр булган.
Ай юрганы : Дөнья халыклары әкиятләре / [тәрҗ. һәм төз. Разил Вәлиев ; рәссамы Диләрә Нәүрузова].- Казан : Татар, кит. нәшр., 2011.- 302 б.
ISBN 978-5-298-02107-4
Китапта дөнья халыклары әкиятләре туплап бирелә. |
