Инде нишләргә? Патша уйлаган-уйлаган да, ниһаять, уйлап тапкан. «Кем дә кем колак ишетмәгән, күз күрмәгән нәрсәләр сөйли, кем дә кем патшаның үзен алдый ала, шуңа алтын алма бирәм»,— дип хәбәр салган. Әлеге хәбәрне ишеткән халык сарайга агылыпмы-агыла икән. Бае да килгән, ярлысы да, сәүдәгәре дә... Барысы да тузга язмаганны сөйли, ә патша килгән берсен куып җибәрә тора, ди.
Менә сарайга бер ярлы кергән. Җиргә кадәр иелгән дә патша алдына бик зур чүлмәк куйган. «Нәрсә кирәк сиңа?» — дип сораган патша. «Мин синнән бурычымны алырга килдем. Әллә бер чүлмәк алтын алып торганыңны оныттыңмы? » — дигән ярлы.
Патша тәхетеннән сикереп үк торган. «Әллә акылыңнан яздыңмы? Нинди алтын алыйм мин хәерчедән?! Ата ялганчы!» — дип җикергән патша. «Ялганчы булсам, алтын алмаңны бир!»— дигән ярлы. Патша шулчак үзенең ялгышын аңлап алган. «Шул да булдымы ялган?! — дигән ул, елмаеп.— Шаярасың гына бит син, әйеме?» «Ялган түгел икән, алтыныңны кой»,— дип, чүлмәгенә чиерткән ярлы. Тегеләй иткән пат¬ша, болай иткән... Алтын алма бик кызганыч, бер чүлмәк алтын аннан да кызганычрак икән аңа. Ләкин нишлисең, алтын алманы барыбер ярлыга бирергә туры килгән, ди...
Ай юрганы : Дөнья халыклары әкиятләре / [тәрҗ. һәм төз. Разил Вәлиев ; рәссамы Диләрә Нәүрузова].- Казан: Татар, кит. нәшр., 2011.- 302 б. ISBN 978-5-298-02107-4
