| Посетители |
Онлайн всего: 11 Гостей: 11 Пользователей: 0 |
|
Главная » 2024 » Декабрь » 8 » МӨГЕЗЛЕ ПАТША (Грузин халык әкияте)
МӨГЕЗЛЕ ПАТША (Грузин халык әкияте) | 09:35:46 |
Борын-борын заманда яшәгән, ди, бер патша. Көннәрдән бер көнне моның маңгаена мөгез үсә башлаган. Мөгезен күрмәсеннәр дип, ул көндез дә, төнлә дә башыннан таҗын салмый икән.
Патша, бу хакта башкалар белмәсен өчен, аның чәчен алган чәчтарашларны үтерергә әмер биргән. Шулай беркөнне шәһәрдәге соңгы чәчтарашка да чират җиткән. Патшаның чәчен алганнан соң берәүнең дә исән калмавын белгәнгә, ул, гаиләсе, туганнары белән хушлашып, сарайга юл тоткан. Чәч ала башлауга, патшаның маңгаендагы мөгезне күргән бу, әмма, берни булмагандай, эшен дәвам иткән. Патшага чәчтарашның илтифатсызлыгы ошаган һәм ул аны исән калдырырга боерган.
— Әгәр бүген нәрсә күргәнеңне берәрсенә сөйләсәң, башыңны кистерермен,— дип кисәткән ул чәчтарашны.
Исән-сау килеш өенә кайтып кергәч, сөенешкән туган-тумача моннан сарайда ни күргәннәрен сораша башлаган. Әмма чәчтараш, куркуын эченә йотып, бер сүз әйтми, тып-тын гына утыра икән. Патша мөгезе турындагы серне эчендә саклый торгач, моның корсагы, көннән-көн үсеп, берзаманны борынына кадәр җиткән, ди. Түзәр чамасы калмагач, чәчтараш сазлык читендәге камышлыкка килгән дә бар көченә болай дип кычкырган:
— Безнең патшаның маңгаенда мөгезе бар!
Шулчак аның эче бушанып, корсагы күзгә күренеп шиңә башлаган.
Шулай беркөнне сазлык читеннән үтеп баручы кеше камыш көпшәсе кисеп алган да сыбызгы ясаган. Сыбызгыны авызына кабып өрүгә, аннан: «Безнең патшаның маңгаенда мөгезе бар!» — дигән сүзләр яңгыраган:
Икенче көнне үк патша мөгезе хакындагы хәбәр бөтен шәһәргә таралган. Моны ишетеп ярсыган патша чәчтарашны тотып китерергә боерган.
— Минем мөгез турында син хәбәр тараттыңмы? — дип җикергән ул чәчтарашка.
— Юк,— дигән чәчтараш,— мин беркемгә дә сөйләмәдем.
— Алайса, кем авызыннан чыга мондый хәбәр?
— Ә сез базардагы сыбызгы сатучыны чакырыгыз да үзегез аның сыбызгысын сызгыртып карагыз. Минем гаепсез булуыма ышанырсыз.
Хезмәтчеләр күз ачып йомганчы базардагы сатучыны алып килгәннәр. Патша авызына сыбызгы алып сызгыртуга, аннан:
— Безнең патшаның маңгаенда мөгезе бар! — дигән сүзләр яңгыраган.
Менә шуннан соң патша бик ачуы килсә дә, бу сүзләр үз авызыннан чыкканга күрә, чәчтарашны исән-сау килеш өенә кайтарып җибәрергә боерган, ди. |
|
Категория: Дөнья халыклары якиятляре |
Просмотров: 3 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
