| Посетители |
Онлайн всего: 6 Гостей: 6 Пользователей: 0 |
|
Главная » 2024 » Декабрь » 8 » ӘПӘНДЕ БЕЛӘН КАЗЫЙ (Кыргыз халык әкияте)
ӘПӘНДЕ БЕЛӘН КАЗЫЙ (Кыргыз халык әкияте) | 12:43:41 |
Беркөнне өенә кайтып барганда, Әпәнде канауда аунап ятучы исерек кешене күргән. Исерек, бар дөньясын онытып, гырлый- гырлый йоклап ята, ди. Әйбәтләбрәк караса, бу шәһәрнең казые икән.
Уйлап-уйлап торган да Әпәнде исерек казыйның халаты белән түбәтәен алып ары киткән.
Казый йокыдан уянса, халатыннан да, түбәтәеннән дә җилләр искән. Кеше-кара күргәнче дип, ул кача-поса өенә таба йөгергән.
Икенче көнне казый үзенең ярдәмчеләрен җыйган да болай дигән:
— Кемдер кичә минем түбәтәем белән халатымны урлаган. Тиз арада шул адәмне табып, монда китерегез! Күрмәгәнен күрсәтәчәкмен мин ул угрыга!
Егетләр шәһәр буйлап каракны эзләп киткәннәр. Ике егет базарга кереп баручы Әпәндене күреп алган. Аның кулында сатарга дип алган әлеге халат белән түбәтәй икән. Егетләр, Әпәндене тотып, хуҗалары янына алып киткәннәр.
— Бу минем әйберләр бит. Син аларны каян алдың? — дигән казый.
— Кичә кич өйгә кайтканда, мин канауда аунап ятучы бер исерекне күрдем. Берәрсе урлап китмәсен дип, киемнәрен салдырдым да өйгә алып кайтып куйдым. Менә бүген шуларның хуҗасын эзләп базарга чыккан идем... Бу халат белән түбәтәй сезнеке булса, мәгез, рәхим итеп алыгыз,— дигән Әпәнде.
Казый, ярсуыннан нишләргә белмичә, кызарынган-бүртенгән дә кычкырып җибәргән:
— Минем беркайчан да канауда аунап ятканым юк! Бу түбәтәй белән халат минеке түгел! Бар, ычкын моннан!
Әпәнде, башын ия-ия хәйләкәр елмаеп, казый яныннан чыккан да туп-туры базарга киткән. |
|
Категория: Дөнья халыклары якиятляре |
Просмотров: 4 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
