| Посетители |
Онлайн всего: 1 Гостей: 1 Пользователей: 0 |
|
Главная » 2024 » Декабрь » 9 » ӘТӘЧ НИГӘ КЫЧКЫРА? (Эвенк халык әкияте)
ӘТӘЧ НИГӘ КЫЧКЫРА? (Эвенк халык әкияте) | 20:08:28 |
Көннәрдән бер көнне Хартагай исемле аучы, атка атланып, урманга ауга чыгып киткән. Бара торгач, урман аланында ул кыргый тавыклар күргән. Билгеле, моңа бик сөенгән бу. Тиз генә ат кылыннан үреп, аланга ятьмә корган да, тавыкларны тотып, өенә алып кайткан. Тавыкларны суеп, кунак җыярга уйлаган Хартагай. Шулчак тавыклар күз яшьләре агызып елашырга тотынганнар.
— Хартагай, Хартагай! Зинһар өчен, харап итмә безне! Без сиңа бик күп итеп йомырка салырбыз, тамагың һәрчак тук булыр,— дигәннәр алар аучыга.
Хартагай боларның сүзенә ышанган. Ләкин, очып китмәсеннәр дип, тавыкларның канат очларын кискән дә үзе тайгага ауга кузгалган.
Тавыклар, бергә җыелып, тагын елашырга тотынганнар. Бик тә, бик тә иреккә очып китәселәре килгән аларның. Ләкин, киселгән канатларын күпме генә җилпесәләр дә, җирдән күтәрелә алмаганнар. Шулчак Әтәч бүрәнә өстенә сикереп менгән дә болай дип сөрән салган:
— Кайгырмагыз, дусларым! Мин һәр иртәне Хартагайдан канатларыбызны сорап кычкырырмын. Иртән бирмәсә, төш турында сорармын. Төш турында бирмәсә, кич җиткәч, тагын кычкырырмын!
Тавыклар моңа бик куанганнар. Әтәч «кикрикүк» тә «кикрикүк» дип кычкырырга тотынган. Ләкин Хартагай аны ишетмәгән. Чөнки ул тайгага чыгып киткән җиреннән кире әйләнеп кайтмаган икән.
Шул көннән бирле Әтәч әле һаман кычкыра, ә Хартагай һаман тайгадан кайтмый, ди. |
|
Категория: Дөнья халыклары якиятляре |
Просмотров: 2 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
