| Посетители |
Онлайн всего: 3 Гостей: 3 Пользователей: 0 |
|
Главная » 2024 » Декабрь » 9 » ТӨЛКЕ БЕЛӘН ӘТӘЧ (Фарсы халык әкияте)
ТӨЛКЕ БЕЛӘН ӘТӘЧ (Фарсы халык әкияте) | 16:40:11 |
Чындырмы-юктырмы, белмим, яшәгән, ди, кайчандыр бер карт Әтәч. Ничәмә-ничә мәртәбә Төлке тырнагына эләгеп тә ниндидер могҗиза белән исән калган ул.
Шулай беркөнне, авыл читендә җим эзләп йөргәндә, моның каршысына тагын Төлке килеп чыккан. Йөгереп качып булмасын чамалагач, Әтәч канатларын җилпегән дә янәшәдәге тал ботагына менеп кунаклаган. Төлке шунда ук агач төбенә килеп чүгәләгән һәм аңа болай дип сүз каткан:
— Әй, Әтәчкәй, мине күргәч, нигә агачка очып кундың? Курыктыңмы әллә?
— Йөгереп барып кочаклар дигән идеңме?
— Син бернәрсә дә белмисең бугай,— дип гаҗәпләнгән Төлке.— Падишаһыбыз өр-яңа фәрман чыгарды бит. Ошбу көннән башлап безнең дәүләтебездә бер җан иясе дә үзеннән көчсезләрне, зәгыйфьләрне, кечеләрне кыерсытмаска тиеш. Моннан ары бүреләр белән сарыклар чишмәдән бергәләп су эчәрләр, лачыннар белән күгәрченнәр бер ояда яшәрләр! Әйдә, курыкмыйча җиргә төш тә, икәү бергә кочаклашып урам әйләнербез, кәеф-сафа корырбыз.
— Мондый зур шатлыкны башкалар белән дә бүлешергә кирәк, дустым. Бераз көтсәк, алар килеп тә җитәрләр... Әнә болайга таба чабалар да бугай инде. Озак көтәсе калмады,— дип, агач ботагыннан аваз салган Әтәч.
Шулчак Төлке, сагаеп кына:
— Нинди җан ияләре анда? Чынлап та болайга таба чабалармы? — дип сораган.
— Әллә бүреләр инде? Алай дисәң, колаклары да зуррак, койрыклары да озынрак кебек...
— Алайса, ау этләредер инде...
— Чынлап та, этләр бугай шул...
Бу сүзләрне ишеткәч, Төлке, алдына-артына карамыйча, урман ягына таба элдерткән.
— Кая чабасың? — дип кычкырган аңа Әтәч.
— Ау этләре белән дуслыгым юк минем,— дигән Төлке.
— Падишаһыбыз дус-тату яшәү турында фәрман чыгарган, дидең бит үзең...
— Бу этләр, далада чабып йөреп, бәлки, фәрманны ишетми калганнардыр. Аннан соң бик усал күренәләр. Бер дә эт авызына керәсем килеп тормый әле.
Төлке шулай дигән дә карурманга кереп югалган, ди, ә әтәч аның артыннан елмаеп карап калган. |
|
Категория: Дөнья халыклары якиятляре |
Просмотров: 2 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
