| Посетители |
Онлайн всего: 9 Гостей: 9 Пользователей: 0 |
|
Главная » 2024 » Декабрь » 9 » ТЫЛСЫМЛЫ ЯУЛЫК (Кытай халык әкияте)
ТЫЛСЫМЛЫ ЯУЛЫК (Кытай халык әкияте) | 09:41:54 |
Борын-борын заманда яшәгән, ди, бер бай кеше. Бик тә комсыз һәм явыз булган ул. Хатыны да үзе төсле икән. Шулай беркөнне хезмәтче ялларга уйлаганнар болар. Саранлыктандыр инде, хезмәтченең иң очсызын, иң ямьсезен сайлаганнар һәм аңа «Маймыл» кушаматы кушканнар.
Хуҗалар өйдә юк көнне боларның ишеген бер хәерче шакыган.
— Ачтан үләм бит, зинһар, ярдәм итегез! — дип ялварган ул.
Хезмәтче кыз кечкенә төенчек белән аңа дөге чыгарып биргән.
— Әгәр хуҗаларым белсә, икебезгә дә көн юк,— дигән ул хәерчегә.
Хәерче, саубуллашканда, аңа ал төстәге яулык биргән һәм:
— Һәр иртәне шушы яулык белән битеңне сөртерсең,— дигән.
Хезмәтче кыз, таңнан торып, өч көн рәттән шул яулык белән битен сөрткән. Дүртенче көнне көзгедә гаҗәеп чибәр кызны күргән.
Хуҗа белән хатыны хезмәтчеләренең нинди гүзәл кызга әверелүен күреп гаҗәпләнгәннәр.
— Сереңне ачсаң, алтын-көмешкә күмәрбез,— дигәннәр алар.
Хезмәтче кыз, сөенеп, аңа әлеге ал яулыкны биргән. Хуҗа белән хатыны хезмәтчене, качмасын дип, бүлмәгә бикләгәннәр, хәтта этләрен дә бәйдән ычкындырганнар. Битләрен яулык белән алмаш-тилмәш сөрткәннән соң йокларга ятканнар. Иртән котлары очудан кычкырып җибәргәннәр. Көзгедән аларга битләрен йон баскан ике иләмсез маймыл карап тора икән.
— Теге маймыл кызы безне алдады! — дип җикергән шулчак бай.
Хуҗа белән хатыны, ишегалдына йөгереп чыкканнар. Бәйдән ычкынган этләр, ике шөкәтсез маймылны күргәч, өрә-өрә, аларның өсләренә ташланганнар. Ә маймыллар, сикерә-сикерә, урманга кереп качканнар.
Шулай итеп, бай һәм аның хатыны маймыл тормышы белән яши башлаганнар. Ә хезмәтче кыз бәхетле тормыш корып җибәргән, ди. |
|
Категория: Дөнья халыклары якиятляре |
Просмотров: 2 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
