| Посетители |
Онлайн всего: 5 Гостей: 5 Пользователей: 0 |
|
Главная » 2024 » Ноябрь » 20 » СОРАУ-ТАБЫШМАКЛАР
СОРАУ-ТАБЫШМАКЛАР | 19:13:31 |
— Нәрсә өстәл янында бигрәк кирәк?
— Авыз.
— Нинди савыттан эчеп булмый?
— Буш савыттан.
— Кай вакытта куян ите тәмле була?
— Ашаганда.
— Бернәрсә дә ашамыйча, ничә йомырка ашап була?
— Берне.
— Нәрсә соң ул? Беркемнең дә аны булдырасы килми, Беркемнең дә аннан аерыласы килми.
— Пеләш баш.
— Кайчан бернинди тавыш та ишетеп булмый?
— Тып-тын вакытта.
— Кайсы ай календарьда юк?
— Һавадагы ай.
— Бер якта — поп өе, икенче якта — чәчтарашханәсе. Арада чыга алмаслык сазлык. Поп чәчен алдырырга аръякка ничек чыга?
— Поп чәчен алдырмый.
— Патша кемгә баш ия?
— Чәчтарашка.
— Бер авыл кешесе ат җигеп калага барган. Барып җиткәч, иң башлап ни дигән?
— «Тпру!» — дигән.
— Адәм башына нәрсә куна?
— Бүрек.
— Кешегә иң якын әйбер нәрсә?
— Күлмәк.
— Кайсы елда кешеләр күбрәк ашый?
— Кәбисә елда. (Чөнки бер көне артык.)
— Нәрсәне йомык күз белән дә күреп була?
— Төшне.
— Нәрсәне күрү иң җиңел?
— Кеше гаебен.
— Аучы мылтык атканда ни өчен бер күзен йома?
— Икесен дә йомса, бернәрсә дә күрә алмый.
— Юләр кайчан акыллы була?
— Тик торганда.
— Баш чаклы таш белән тәрәзә ватып буламы?
— Юк. (Таш чебен башы кадәр генә булырга мөмкин.)
— Ул минем аяк астында, үзе миннән өстә; мин аның аяк астында, мин дә аннан өстә. Бу ничек була?
— Җир шарының капма-каршы нокталарында торучы ике кеше.
— Кем үзенең туган көнен дүрт елга бер генә мәртәбә уздыра?
— 29 февральдә туган кеше.
— Бер кеше утырып тора, ди. Ул торып китсә дә, син аның урынына утыра алмыйсың. Ул кеше кайда утыра?
— Синең тезеңдә.
— Кеше йоклый, төш күрә: бер ягында юлбарыс, икенче ягында текә яр, өченче ягында диңгез, дүртенче ягында куе урман. Бу кеше ничек котыла?
— Уянып.
— Рәмзия җиде яше тулгач нишли?
— Сигезгә чыга.
— Куян чаба-чаба да, ник артына әйләнеп карый?
— Артында күзе булмаганга.
— Ат ни өчен улак янына килә?
— Улак аның янына килмәгәнгә.
— Сыер ни өчен ята?
— Утыра алмаганга.
— Сыер судан чыккач нишли?
— Коры җиргә баса.
— Кәҗә судан ничек чыга?
— Юешләнеп.
— Кунган кошны куркытмыйча гына ничек итеп агач ботагын кисеп ташларга?
— Кош үзе очып киткәч.
— Нәрсә өстән аска таба үсә?
— Сакал.
— Кем ике мәртәбә дөньяга туа?
— Чебеш.
— Бүрегенә чыпчык кунганда каравылчы нишли?
— Йоклый.
— Кемнең сакалын кырдырырлык та акчасы юк?
— Кәҗәнең.
— Яңгыр яуганда куян нинди куак астында утыра?
— Юеш куак астында.
— Кара мәче нинди ишектән керә?
— Ачык ишектән.
— Каз нигә йөзә?
— Аягы су төбенә тимәгәнгә.
— Ат чаба-чаба да, нәрсәдән ары китә алмый?
— Койрыгыннан.
— Куянның арт аягы нигә озын?
— Ал аягы кыска булганга.
— Алманың яртысы нәрсәгә охшаган?
— Икенче яртысына.
— Нинди сорауга бервакытта да «әйе» дип җавап биреп булмый?
— «Йоклыйсыңмы?» дигән сорауга. (Йокламаса — «юк» дип җавап бирә, йокласа — җавап бирми.)
— Җир өстендә кешеләр нинди авыру белән бер дә авырмыйлар?
— Диңгез авыруы белән.
— Иң җиңелне капка аркылы ыргытып булмый. Нәрсәне?
— Йонны.
— Машинаның кайсы тәгәрмәче әйләнми?
— Запас тәгәрмәче.
— Көнчыгыш белән көнбатыш арасы ни чаклы?
— Кояш йөреше белән бер көнлек юл.
— Суны кайчан иләк белән ташыйлар?
— Карга әйләнгәч.
— Су кайда коры була?
— География картасында.
— Суда нинди таш булмый?
— Коры таш.
— Кара диңгезгә төшкән таш нишли?
— Юешләнә.
— Иң әүвәлге чүлмәкне кем яндырган?
— Ут.
— Урта урамнан берәү барган. Кибеткә кереп, бер эшләпә сатып алган. Нигә сатып алган?
— Бушлай бирмәгәнгә.
— Урманга нәрсә белән баралар?
— Юл белән.
— Нинди сәгать тәүлеккә ике генә мәртәбә вакытны дөрес күрсәтә?
— Туктаган сәгать.
— Бер имәндә өч ботак, ботак саен өчәр алма. Барысы ничә алма?
— Имәндә алма булмый.
— Нинди агач утта янмый?
— Табагач.
— Нинди ут яндырмый?
— Рәсемдәге ут. |
|
Категория: Халык афоризмнары |
Просмотров: 4 |
Добавил: ilbyak-school
| Рейтинг: 0.0/0 |
|
Добавлять комментарии могут только зарегистрированные пользователи. [ Регистрация | Вход ] |
|
|
